我想講的
其實攪首映禮就好像定期為NPV做些總結，三次的首映禮，三次不同的心情，三次不同的講話。昨天由於嘉賓太多，延遲了開場的關係，我也臨時刪減了一些講話的內容。我很想把本來想說的說一次。現在把本來的手稿原文照錄、分享：
各位親愛的來賓，你地好，演藝界的朋友，寵物業業界的朋友，動物福利界的，在不同區份默默耕耘的動物義工，議員朋友，你地好。各位小朋友同你地的家長, 你地好。多謝你地，我知道有些朋友是NPV三次首映禮都有來的，超級多謝你地。NPV只不過是一個很草根的慈善機構，首映禮沒有衣香繽影，美酒佳肴，你地肯賞面光臨支持，很大的原因會係你地都是愛護動物同支持動物福利的，我同NPV全體執委，代表每一隻因為你地今晚光臨而受惠的小動物；多謝你地。 不錯，不要以為NPV就 只有 阿MARK ，背後還有一班執委，六個女人：MING, AVA, GRACE, VERON , VIVIAN, PHYLLIS. 就只有我一個男人。 多謝！
先同大家講一個故事：崖上的玻兒。 大概一個月前，NPV 的獅山行動組在獅子山上的其中一個山崖拯救了隻狗BB，兩個月大。狗BB 被人夾硬塞進了一個闊身窄口的玻璃樽內，景況係點，大家想象一下。 後來當然係由獅山行動組，打爛這個玻璃做的緊「cool」咒。現在已經被人領養了。
係六年前，有一日我地幾個NPV的創辦人走在一起，每人要講一個原因去說服對方，點解要辦非牟利獸醫。 我好記得當時的答案係，我想還債。即是我想做小威的角色。 即是像剛才vivian講到小威點樣去主動化解佢同主人之間的怨恨。
我地欠動物實在太多了。 如果真係有報應，我地下一代的報應會好深。 就算如果冇報應，簡單作為一個普通好愛錫動物的人，我呢一生的遺憾會好深。
過左六年，今日，npv有三間非牟利獸醫診所，每日為超過百幾隻動物診症，係一間不折不扣的非政府資助的動物公立醫院。仲成立了「npv流浪動物醫療基金。」， 當我有少少沾沾自喜的時候，再睇下好似玻兒的故事，其實無日無之，四處有動物被商人為了圖利而殘害，貓狗依然係大部份中國人社會的食用動物，我就知道NPV呢d微不足道的成就，其實連還息都未夠。所以, Npv所有的執委們，義工們，動物福利界的同業，是長命債呀！ 我地仲有排捱！繼續努力！
小威現在正為日本災後重建籌款。小威今日又幫我地籌款，幫動物，幫返佢的同伴，幫完人又幫動物！ 今日有一班小威善長，佢地贊助了兒童心臟基金會及地中海貧血兒童基金的一班小朋友來呢個首映禮。，佢地同小威一樣咁厲害，幫到動物，又幫到小朋友。我地俾掌聲呢班善長，同呢班小朋友。
首映禮是一個好好空機會可以一次過向好多NPV的恩人深切咁致謝。先多謝NPV的老朋友，三次首映禮都是golden scene的電影 , 由我地未成立到到今日，佢地一搵到d貓狗電影就第一時間通知我，多謝winnie，多謝christine。三次首映都有贊助的忘不了寵物善終服務，多年來不離不棄的贊助伙伴，仲有 kangerwood , 兩次首映，環保袋，月歷，不斷的贊助，不斷的支持 。然後就係好多一出聲就會拔刀相助的sunny, sun travel, vetmedcare寵物傷健產品, greenies潔齒骨。 贊助飲品的葛蘭素史克有限公司，同麥提沙。媒體贊助寵物達人。
最重要當然係今晚的冠名贊助netro natural choice.。Nutro Natural Choice同NPV有相同嘅理念，大家都致力教育大眾做個負責任嘅寵物主人同埋鼓勵領養寵物；我哋合作無間以推廣呢個理念，而家正好又合作搞緊一個好大型創新的推廣領養嘅活動。 大家要留意facebook。多謝Nutro Natural Choice。
最後再一次多謝周慧敏，很多人問我vivian在npv是什麼身份？代言人？大使？我唔識答。 但我同好多人都一樣，覺得NPV就係周慧敏，周慧敏就係NPV。其實要講的多謝說話已經講無可講，不下數十次在不同場合我都想用不同的言詞去多謝佢，到今日先發覺原來我的文字原來都幾貧乏，已經想唔到新鮮的講法去表達NPV對佢的謝意，同佢對香港動物福利界的貢獻。
其實npv由零開始到今日，好多野都係我，vivam所估唔到，估唔到由三幾個人，去到今日十幾個獸醫，70幾個員工。估唔到在這個涼薄的社會有一個專為一些在人眼中賤過地底泥的流浪狗服務的「醫療基金」，令我地有能力每日拯救流浪動物，為數以百計的流浪動貓狗做絕育。更估唔到會有幾百個義工，同我地並肩作戰。最神奇的是獅子山行動組，我特別要提的是獅山行動組。呢班義工是神經的。風雨不改，烈日當空三幾度每星期抬100公斤狗糧上山，用盡方法上獅子山捉狗，搖搖晃晃抬兩隻幾十公斤的狗落山返npv絕育。係呢度我向你地獅山行動組致敬！希望大家俾掌聲呢班神奇義工！
呢d咁多的估唔到，呢d係我發夢都估唔到的，而最後夢想成真的事實，係由當初vivian一句說話開始，mark，你放膽去做啦，我一定無限量全力支持。咁佢咁講，我就咁信啦。佢係講真的，呢句說話一開始，到今日，佢亦一直冇停過支持，今次vivian 又將佢處女配音的酬勞捐給npv。多謝阿v。
大家要留意呢套戲阿V的演出，不錯，是一次演出，太神似太自然了。到戲中段，我一直還以為藥師丸博子本來是識廣東話的。
唔阻大家睇戲了，最後…這些年來我在診所，在街上面，在FACEBOOK, 聽到最多的是兩句說話，一句是多謝一句是加油：我在這裡一次過反彈給你地：多謝、加油！！
