光頭旺週記

十月四日星期一：
在NPV過了一個月了，做了幾個手術，可謂走過了鬼門關，死過番生。很多關心我的人常常問：「你好返未？你出院未？」我想同所有哥哥姐姐講：「我好返好耐啦，仲有d皮膚病醫緊，出得院，不過又未出院。因為一直未有人肯領養我。」點解呢？我咁乖，又識sit sit hand hand，又唔會吠。唔通我好醜樣？不過好彩呢度d哥哥姐姐同醫生錫哂我，我都住得好開心，就算叫我走我都有d擔心，有時護士哥哥話拖我出街行我都唔係好敢，細膽，怕怕。
不過今日聽到mark哥哥同一直湊住我個frankie護士哥哥講：「有人領養旺仔啦，你得閒要多d帶旺仔出街行，等佢習慣見下人。」

我知道有人肯收養我，我梗係開心啦，但又好驚自己唔適應，又怕人會嫌棄我係流浪狗，仲有，其實都好唔捨得npv……

十月五日星期二：
MARK哥哥好急咁走來問我，想唔想義犬報恩？我係小朋友乜都唔識，只要MARK 哥哥同KITTY 姐姐話OK就冇問題。咁究竟係做咩呢？下？輸血？原來有隻狗仔手術後嚴重貧血，情況危急，需要找年青力壯的大狗即刻輸血。我雖然好驚，但又點可以拒絕呢，自己都係俾人無條件咁救返，而家其他狗狗有難，我驚驚都要頂硬上。 講真，當我醒返見到DR EDMUND 幫我抽出的一大袋血，真係嚇死我。所以我好快就博命食好多野，補返數。

十月六日星期三：
MARK 哥哥冇呃我，原來輸血真係小兒科，我今日已經精神爽利，同之前一樣。而隻貧血狗B就住係我隔離，都精神返好多。 原來幫到人真係好開心既。我開始明白點解咁多人未見過我，都會咁落力幫我。

MARK 哥哥同我講，KITTY 姐姐都同意了我今個星期六出院去新媽咪屋企。下？咁快？ MARK哥哥話NPV始終係醫院，唔係一個家，我要盡快走。我個心唔知點解十五十六……

十月七日星期四：
今日在診所大堂，有個客人問，我係咪金毛尋回犬。MARK哥哥答佢，我係金毛溝拉布拉多再溝唐狗。係百年難得一見的混血兒。我而家先知我咁勁。

新媽咪來了探我，仲帶我行街。不過我真係好驚，始終係陌生人。FRANKIE 奶媽今日又冇返工。我行前一步退後兩步，足足用左半個鐘先出到診所門口。之後見新媽咪好有耐性同愛心咁我，我放心了，就好開心咁同媽媽行左一個圈。媽媽話明天中午12點來接我走。我心情真係好複雜，又期待, 又擔心, 又唔捨得，總之就怪怪咁……

十月八日星期五：
我由早上開始等，一直等，十二點過了，新媽咪沒有來。兩點，四點, …沒有人通知我出院。 那隻我給他輸血的小朋友都出院了。我還在等。

後來MARK 哥哥過來跟我說，新媽咪家裡有事，暫時不能收養我。我看得出他仲失望過我。

十月九日星期六：
今日是我在NPV的第三十八天了，NPV來了很多新哥哥姐姐，他們都話我好靚仔，一定有人領養，唔好灰心。我冇事喎，我不知幾有信心，遲早有人會帶我返屋企。
好似我咁靚仔既混血兒，大把人搶住要。

希望下次係我的新主人向大家報告近況。

光頭旺