【領養點滴】棉花糖

棉花糖係我哋第一隻領養嘅貓。當初都會擔心「流浪貓」會怕人或者有攻擊性。但棉花糖「可摸可抱、嗲人同愛說話」既性格,令到我地對流浪貓完全改觀。

記得領養返黎嘅第一晚,見佢已經肯進食、肯如廁,甚至肆無忌彈跳上我地床尾「攤屍」,就知道佢已經接受呢間屋成為佢終生既家。

養左綿花糖之後,呢個家都開始熱鬧起來,有時只係望住佢攤屍、追廁紙筒、玩毛毛棒或者係追自己條尾,我哋都會不其然笑左出黎~

當然,佢都有搗蛋既時候,好似會靜靜雞偷入廚房、半夜將枱面既野掃晒落地下、又或者推開個衣櫃入去玩,真係會令你變咗「阿燥」,但之後佢又會喵喵叫同用條尾仔撞你,果一刻又真係俾佢嘅嗲功溶化咗,嬲佢唔落。

棉花糖嘅出現,令到我地更加有動力學習點樣同貓仔相處,會去搜尋一些對佢有益的糧食,同埋日常護理嘅方法等等。雖然投放係棉花糖身上既時間用多咗,但係佢眼中,我地係唯一俾到快樂佢既朋友。所以無論日後條路有多漫長、中途有多障礙,我地都會堅持陪棉花糖走過每一段路。