【領養點滴】富貴妹

Mocha  (舊名 富貴妹)，九個月大既靚女三腳狗，係NPV 於今年六月港島南區救返來，

當時佢多處傷痕，全身佈滿食肉蛆同牛蜱，嚴重脫水貧血及牛蜱熱，
右前掌被整齊斷去嚴重發炎，需要做手術截去整條右前肢保命。

一開始，我以為得返三隻腳係佢最大既缺陷，
但原來，對人類完全失去信任，先係佢最痛苦既缺陷。
第一次探佢，佢好驚，真係好驚，即刻搵地方匿埋然後不斷顫抖，
第二次見更嚇到一路逃走一路失禁。雖然走埋去任摸都唔反抗，但仍然瑟縮一角不停震。
換句話說，佢清楚體驗過無論人類對佢做d咩，點反抗都無用，
好難想像人類究竟對佢做過D乜野，先令佢恐懼到呢個程度。

雖然，報道指Mocha既右前肢可能係捕獸器夾斷，
但從佢對人類無比既不信任以及懼怕，更令我相信當中肯定涉及人為虐待。
如果兇手你見到呢個Post，我可以話你知，虐待一隻幾個月大既狗B，
甚至整斷左佢隻手由得佢自生自滅，
只係證明你既力量弱小到要靠折磨弱者去掩蓋你自卑病態既人生，
你可悲到連被我唾罵既資格都無。

如果你認識兇手，或者係今年五月至六月於薄扶林置富花園附近目擊到事發經過，
或者見到有人放置捕獸器，我建議你盡快向警方提供資料。
當虐待狗B唔能夠令兇手滿足時，或者嫌捕獸器唔夠威力時，
佢自然會挑戰較強大既目標，或者設置更致命既捕獸陷阱
可能係成犬，可能係貓，亦可能係路人，下手亦可能更重更殘暴，而你一時既沉默只會成就更多受害者。

幸運地，今日既Mocha毋需生活係恐懼之中，雖然要佢重拾對人類既信任仍有一段距離，但起碼會佢得到好好既照顧。
可能係好多人眼中，Mocha係唔完整，但係我眼中，Mocha絕對係完美。

最後，我係到以Mocha主人身份，多謝NPV拯救左富貴妹，亦好多謝出過錢出過力既有心人，以及多謝家人朋友支持我將富貴妹變成我既Mocha。
同埋多謝蕃茄。
歡迎親朋好友探訪或者送玩具 

p.s. 捐款就唔會接受架啦，想捐既可以捐畀NPV