【專欄文章】 2020年2月7日 埋單唔該 AM730


 

大家有冇發覺,一個武漢肺炎叫全人類恐慌,但最關事既,由一開始到依家,竟然都係動物! 唔計寵物,唔計禽畜,動物好地地在地球上自生自滅自得其樂,唔知點解就成日俾人捉,剝皮拆骨,著上身又有,食落肚又有! 以前以為野味嘅嘢,食來食去都係果子狸穿山甲,點知一個武漢肺炎先叫大家對中國飲食文化既博大精深大開眼界!冇人諗過蝙蝠都可以食(亦唔知點解要食),點知原來仲可以有咁多食法,仲要男女老幼都鍾意食!打破了新一代年輕人不食野味的天真想法。再看那餐單上野味菜式之琳琅滿目,好多連名都未聽過寫都唔識寫都有得食,說中國人背脊向天都會吃實在是低估了。到最後食出了一個禍,又唔見得中國人有幾後悔,發誓以後唔食野味??你諗都唔使諗!

 

到疫情爆瘋了!中國人慌了!開始藥石亂投,竟然有人傳出所有感染者都冇養貓,而所有養貓的人都冇感染,於是結論係養貓可以防疫。荒謬到咁都有人信,而且係全城出現搶貓潮,只要係貓都會俾人捉,今次唔係食,係用來旁身!咁你以為貓貓會有幸福?那你太年輕了,疫情一過,就是棄貓潮的開始!

 

而另一邊廂又有人亂傳假消息(其實好多只要用腦就分得到是真是假),話新冠狀病毒可以人貓互傳。於是好多家庭手起貓落——街!這些家養的貓是被流言所害?非也,是死於沒良心的主人手上。

 

未幾,國內外都有人揚言有新藥可治療新肺炎,萬事俱備,只欠動物測試!即是話,未來日子好多動物要去送死,為了拯救一班之前因為害死動物而染病嘅人類!嘩!我好亂呀?咩邏輯?咩世界?動物的存在,是為人類埋單?

 

 

動物緣 – 麥志豪

非牟利獸醫執行主席,多棲動物,人面獸心。 對香港幾乎絕望,對人生充滿希望。 滿肚密圈,老馬可能走火,惹不過。